— Вельмі прыемна бачыць вынікі сваёй працы, — гаворыць лесавод Бярэзінскага лясгаса Аксана Каравая. – А тут яны навідавоку. У зямлю кладзеш маленькае насенне, а потым дзень за днём назіраеш, як развіваюцца, растуць саджанцы, пераўтвараюцца ў дрэўцы, кветкі. А колькі яшчэ трэба прыкласці клопатаў і старання, каб кволая раслінка стала пышным кустарнікам ці яркай петуніяй! Аб нястомнай штодзённай працы лесавода Аксана Мікалаеўна сціпла замоўчвае. Толькі ёй і яе калегам па лясной галіне вядома, як патрэбна гадаваць, паліваць, акучваць, абараняць ад пустазелля зялёных выхаванцаў гадавальніка…

А вопыту ў гэтай справе ў Аксаны Мікалаеўны дастаткова, бо ўжо на працягу амаль 15 гадоў яна шчыруе ў базісным гадавальніку Бярэзінскага лясгаса, плошча якога складае 27 гектараў. Штогод тут вырошчваецца каля 20-30 тысяч адзінак дэкаратыўна-пасадачнага матэрыялу. Асартымент разнастайны — хваёвыя культуры з розным адценнем хвоі: ад блакітнага да залацістага, дэкаратыўныя ліставыя кустарнікі ў асартыменце – барбарысы, ядловец, спірэя і інш., больш за 5 формаў туй, кветкі розных найменняў. — Наша прадукцыя дэманструецца на розных пляцоўках, — з гонарам распавядае Аксана Мікалаеўна. – Так, мы ўдзельнічалі ў абласных “Дажынках”, летась у Барысаве, сёлета – у Чэрвені, часта бываем у Мінску на выставах-продажах і, зразумела, удзельнічаем у раённых кірмашах.

— Разам са мной, — дадае жанчына, — шчыруюць Таццяна Казак, яна наш брыгадзір, лесаводы Вольга Пятрова, Святлана Савіцкая, Жанна Стасевіч, трактарыст Васілій Шклейнік. Калектыў наш зладжаны, дружны, а, вядома ж, атмасфера, якая пануе ў калектыве, таксама станоўча ўплывае на добрыя вынікі агульнай справы.

Березинская Панорама

• Назад
• Вперёд