Лес для Вячаслава Бандарчыка – не проста месца працы. У лесе спалучыліся і яго лёс, і лёс яго бацькі, і клопаты, і натхненне… Вячаслаў Міхайлавіч чвэрць стагоддзя шчыруе лесніком у Пагосцкім лясніцтве Бярэзінскага лясгаса. Так сталася, што калі яго бацька Міхаіл Іванавіч пайшоў на пенсію, ён, як прадстаўнік маладога пакалення, прыйшоў на дастойную яму замену, што з цягам часу паказаў сваёй стараннай добрасумленнай працай. Дарэчы, бацька Вячаслава, прарабіўшы лесніком тры дзесяцігоддзі (тут жа, у Пагосцкім лясніцтве) змог перадаць сыну частку свайго вялікага вопыту, ведаў і сакрэтаў лясной прафесіі. Вячаслаў Міхайлавіч — і ляснік, і вальшчык, і трактарыст. Ён заўсёды пры справе: трэба разбіраць буралом – бярэ ў рукі пілу; працуе і на валцы лесу, і на падрыхтоўцы глебы для пасадкі маладых насаджэнняў… Работы ў лесе заўсёды хапае. Неаднаразова за шматгадовую плённую працу Вячаслаў Міхайлавіч адзначаўся заслужанымі ўзнагародамі. Сёлета таксама — у Дзень прафесійнага свята ён удастоены граматы Бярэзінскага лясгаса.

Алена ГРОМАВА. Фота аўтара.

• Назад
• Вперёд