Як паведаміла інжынер па лесаўзнаўленні і меліярацыі лясгаса Вераніка Стасевіч,  сёлета паводле агульнага планавага задання трэба нарыхтаваць 30 тон сасновых і 10 тон яловых шышак.

Прынамсі, да кожнага лясніцтва даведзена планавае заданне ў 4 тоны сасновых і яловых шышак. Па дадзеных на 11 студзеня, у лідарах з паказчыкам у 3 тоны – лесаводы Дзмітравіцкага лясніцтва (ляснічы Максім Валасевіч), а таксама Любушанскага (ляснічы Аляксандр Юрчанка) і Брадзецкага (ляснічы Дзмітрый Мяшалкін). У Любушанскім назбіралі 1 тону 800 кілаграмаў, у Брадзецкім лясніцтве – 1 тону 300 кілаграмаў.

- Нарыхтоўчы сезон мы пачалі ў другой дэкадзе снежня, у перыяд маразоў, - гаворыць начальнік базіснага лесагадавальніка Аляксандр Вайтовіч, - і працягнецца ён да красавіка. У бярэзінскіх лясах пераважаюць хваёвыя пароды дрэў, елак значна менш. Елка пладаносіць адзін раз у 5-7 гадоў, таму яе насення стараемся нарыхтаваць як мінімум на 5 гадоў, каб было дастаткова на лесаўзнаўленне. У параўнанні з мінулым годам ураджайнасць яловых шышак сёлета, можна адзначыць, лепшая.

У адным з памяшканняў сушылкі, дзе шчыльным дываном ляжаць cасновыя шышкі, стаіць незабыўны ўстойлівы водар жывіцы.

Працэс нарыхтоўкі насення сасны і елкі сезонны, аднак уключае шмат ступеняў. Адзін з галоўных этапаў – сушка шышак. Іх размяшчаюць у спецыяльнай камеры па 450 кілаграмаў, дзе яны знаходзяцца пэўны час пры тэмпературы 50-55 градусаў (не вышэй!). Там шышкі прымусова раскрываюцца, каб вызваліць насенне-крылаткі. Дарэчы, вельмі важна не перагрэць шышкі, бо перагрэтае насенне страчвае сваю ўсходжасць.

“Крылатаму”  насенню даводзіцца  прайсці праз выпрабаванні ў гравітацыйным барабане, потым  праз рашотчаты сепаратар насенне ачышчаецца ад смецця. Пад уздзеяннем штучнага ветру слабое насенне выбракоўваецца, а моцнае ідзе на дасушку і фасоўку. Захоўваюцца будучыя саджанцы ў вялізных шкляных бутлях.

- З адной тоны шышак мы звычайна атрымліваем ад 10 да 15 кілаграмаў чыстага насення, - дадае Аляксандр Мікалаевіч. - Вясной частку з іх абавязкова пасеем у пітомніку, каб праз некалькі гадоў высадзіць новы бор або ельнік.

Алена ГРОМАВА.

Фота аўтара.