Крысціна Андрэеўна пяты год шчыруе памочнікам ляснічага, а пачынала свой працоўны шлях лесаводам. Крысціна Андрэеўна пяты год шчыруе памочнікам ляснічага, а пачынала свой працоўны шлях лесаводам. 

- Наогул ўдзельнічала ў пасадках лесу яшчэ калі вучылася ў педагагічным універсітэце імя Максіма Танка, – удакладняе жанчына. – Муж у той час працаваў лесніком і  вельмі падтрымаў маё жаданне. Так, у лесаўзнаўленні Ушанскага лясніцтва мы ўдзельнічалі разам.

Таму рашэнне звязаць свой  далейшы лёс з лесам было невыпадковым. У 2020 годзе Крысціна Савіч атрымала яшчэ адзін дыплом  – Мінскага дзяржаўнага тэхналагічнага ўніверсітэта па спецыяльнасці “Лясная гаспадарка”.

- Нягледзячы на тое, што даводзіцца весці шмат дакументацыі, іншы раз знаходзіць хуткае вырашэнне праблемы, усё ж лічу сваю работу творчай, – дадае Крысціна Андрэеўна. – Да таго ж, вельмі важна умець знаходзіць падыходы да людзей. Дарэчы, тут мне дапамагаюць веды першай вышэйшай - педагагічнай –адукацыі. Пад кіраўніцтвам ляснічага Івана Лукашэвіча з маёй дапамогай шчыруюць чацвёра майстроў і 9 леснікоў, кожнаму выпісваю нарады. А нядаўна наш калектыў папоўніўся маладымі кадрамі. Таццяна Журкова і Кацярына Каршакевіч былі накіраваны ў лясніцтва маладымі спецыялістамі, а яшчэ ўладкаваліся леснікамі браты  - Уладзімір і Дзмітрый Гайдукі. Плошча Ушанскага лясніцтва налічвае 11400 гектараў. Доўгія адлегласці леснікам дапамагаюць адольваць веласіпеды, мотаблокі і скутэры (у каго ёсць адпаведная катэгорыя).

Крысціна Савіч займае актыўную пазіцыю і ў грамадскім жыцці лясной гаспадаркі – знаходзіць магчымасць паўдзельнічаць у конкурсах мастацкай самадзейнасці і ў спартыўных спаборніцтвах. Так, яе вакальныя здольнасці былі неаднойчы адзначаны дыпломамі ў розных намінацыях, а за спартыўнымі ўзнагародамі даводзілася ездзіць нават у Лагойскі раён на “Заячью поляну”. 

Па выніках работы за мінулы год Ушанскае лясніцтва пад кіраўніцтвам ляснічага Івана Лукашэвіча стала лідарам сярод лясніцтваў Бярэзінскага лясгаса і адзначана дыпломам. Прамвыкарыстанне тут у параўнанні з папярэднім годам павялічылі на 4014 метраў кубічных, лесанарыхтоўкі – на 15798 метраў кубічных. Высечкі за доглядам маладых насаджэнняў  склалі больш за 100 гектараў. Павялічылася плошча лесаўзнаўлення – з 85 гектараў да 110,4. Таксама выкананы і іншыя сацыяльна-эканамічныя паказчыкі.

Алена ГРОМАВА.

Фота аўтара.

За плячыма Ганны Іванаўны – 32 гады працоўнага бухгалтарскага  стажу. А ў вачах – столькі цеплыні, разумення і жаночай мудрасці. Ганна Іванаўна – не толькі бязмежна паважаны работнік Брадзецкага лясніцтва Бярэзінскага лясгаса, яна яшчэ і любімая жонка, і клапатлівая матуля, і мудрая цешча, і пяшчотная бабуля. 

Бухгалтар – асоба матэрыяльна-адказная, таму вельмі важна тым, хто выбірае гэту спецыяльнасць, мець такіяякасці, як цярплівасць, уседлівасць, акуратнасць, трэба валодаць высокай канцэнтрацыяй увагі і вялікім аб’ёмам памяці. Гэтых якасцей у Ганны Іванаўны дастаткова.

- Я люблю сваю работу, - гаворыць жанчына, - у бухгалтарскім уліку неабходна дакладнасць, разуменне, што адказваеш за кожную лічбу. А яшчэ важна ісці “ў нагу з часам”, пастаянна быць у курсе змяненняў, шмат чытаць прафесіянальных часопісаў. Нам нельга дапускаць памылкі.

У калектыве Ганна Іванаўна карыстаецца заслужаным аўтарытэтам, пашанай і павагай. За сваю добрасумленную шматгадовую працу яна была адзначана медалём “Ветеран труда”. 

- А некалі працавала ў сталіцы, - прыгадвае жанчына, - на слаўным заводзе гадзіннікаў “Луч”. Сюды, у Брадзец, прывяло каханне. Свайго суджанага сустрэла на вясковых танцах. Муж таксама працуе ў лясніцтве. Выгадавалі з ім дачушку Таццяну. У свой час параілі ёй звязаць свой лёс з лясной гаспадаркай. Цяпер не нарадуемся яе шчасцю.

Таццяна ўжо больш за 10 гадоў шчыруе інжынерам-лесапатолагам Бярэзінскага лясгаса, спецыяліст у лясной галіне дастаткова вопытны. За адказнае выкананне сваіх абавязкаў, прафесіяналізм яна неаднаразова была адзначана граматамі і дыпломамі. Для бацькоў – гэта гонар.

Восьмага сакавіка вясковы дом Дайнякоў напоўніцца весялосцю і кветкамі. Да бабулі абавязкова прыедуць дачушка разам з зяцем  Мікалаем Рыгоравічам і ўнучкамі - Дашай і Вікай. І свята стане поўным – прыгожым і смачным.

Березинская Панорама